人稱袋巾嘅公民黨黨魁梁家傑，佢大女Jennifer早前暫停學業踏上銀色旅途，正隨著名劇團Shakespeare's Globe巡迴演出，原來劇團下個月會來港演出莎劇《王子復仇記》，4至6號喺演藝學院歌劇院上演。袋巾當然會去捧囡囡場，但查實早前劇團喺台灣上演嘅時候，袋巾見近近哋，都有飛過去做粉絲，據知台灣前文化部部長龍應台都喺度，可見個騷幾咁有吸引力。八方聽聞，香港唔少政商界名人亦一早認購咗唔少門票，準備屆時開開心心去睇騷，而5號嗰晚更可謂係「名人夜」，事關民主黨創黨主席李柱銘、前政務司司長陳方安生同公民黨主席余若薇等，都會現身支持袋巾女。