鬼節仲未到，就有粉絲同特首梁振英提早慶祝61歲。咪以為八方講邪嘢，CY雖則西曆8月12日出生，舊曆生日卻係七月十四，唔知點解有十幾名粉絲，噚日知道佢傍晚會去會展出席抗日勝利70周年活動，特別帶同鮮花同生日卡到場，殺入記者群高調大叫「CY，Happy Birthday」同「支持CY」，兼且熱情送禮。
現場唔少記者都覺得呢一幕幾兀突，有啲over咗，而CY收完禮物亦轉身走人，冇回應任何提問，「梁粉」陣地《港人講地》則喺事發後迅速上載短片報道贈興。有傳媒話其中一個送花人係南華集團非執董謝黃小燕，佢所屬的促進現代化專業人士協會曾向CY捐贈100萬競選經費。