鐵定下月1號開幕嘅元朗新商場形點，噚日展示佢哋嘅花呢碌顧客服務員制服，話希望成為潮流形象指標。五顏六色到咁，幾位模特兒拍埋一齊，係咪有啲似日本嘅五星戰隊呢？
形點套衫由形象設計師兼Amusic藝人馬天佑設計，佢話呢個設計「唔想好似西裝咁古板，所以用咗運動風嘅元素」，服務員夏季就要着黃色與桃紅色風褸，冬季就着藍色與粉紅色衛衣，下半身就主要用紫色。
馬天佑噚日着一件橙紅色外套，當佢同4名模特兒拍埋一齊影相嗰時，5個人睇落真係好似日本啲乜乜物物戰隊。潮到咁，將來顧客想搵職員問路，單憑呢一身衣着，要分辨出佢哋到底係職員，還是路人，可能會出現困難囉。
都係嗰句喇，fashion嘅嘢，係得潮人先會明。