關心妍（Jade）做咗人妻之後越嚟越索，上月31日踏入咗36歲嘅佢，五官輪廓仲越嚟越分明。前晚Jade亮相無綫節目《今晚睇李》宣傳新歌《關家姐》，有網友質疑佢個樣又唔同咗，尤其係個鼻好似把間尺咁鬼直，簡直靚爆鏡。
大方繼續自嘲
當年初出道嘅Jade鼻頭比較有肉，鼻翼都闊啲，對於Jade嘅變面疑雲，網友都議論紛紛：「我噚晚睇咗15分鐘都認唔到佢，係完全認唔到嗰隻！」、「如果真係有整容算係唔錯，起碼似番個人樣。」其實，早幾年Jade都同楊穎（Angelababy）撞過面，有口痕友仲封Jade做「Angela心妍」，大方嘅Jade唔單止冇嬲，新歌《關家姐》其實都係將N年前嘅潮文改編玩自嘲。
對於又被質疑整容，噚日身在鄭州為孤兒籌款出席「天下華人同心築夢」活動嘅Jade，透過WhatsApp幽自己一默：「其實都冇乜特別回應，因為已經咁多年，都好習慣，我覺得呢樣嘢同關家姐精神一樣，都係不死嘅。」
撰文：馮仁昭