沽空機構出名「快、狠、準」，即使唔係次次踢得冧目標股票嘅股價，但幾乎每次出報告，都搞到上市公司高層手忙腳亂。不過，近排有單蝦碌嘢都幾好笑，芬佬稍一不慎，隨時沽錯貨。
話說有間新新哋嘅沽空機構叫Emerson Analytics，上周五出咗份報告，唱淡中國光纖（3777），份報告確係寫3777，但附件名稱所寫嘅冧巴就係3337，即係安東油服。
咁啱得咁蹺，安東油服噚日無端端最多跌3%，收市都要跌1.5%。而隻中國光纖就早上中途停牌，投資者想沽都冇計。老實講，呢間沽空機構嘅影響力，跟Glaucus、Muddy Waters相比，唔算好大嗰種，唔係真係有人睇到個附件名稱就走去沽貨咁笨豬啩？