「佢哋係正義嘅化身！」八方講緊當然唔係嗰個扮學生妹嘅正義乜乜黨，「佢哋身懷絕技，武功蓋世」，其實係講緊風捕、阿花、蠻俠同積金博士呢4位主角。向來鍾意拍短片宣傳嘅積金局又有新搞作，今次玩英雄系列，拍攝咗4集《積金英雄》短片，鼓勵打工仔整合佢哋嘅強積金賬戶，唔使要多，一個就夠晒數。
整合賬戶講咗好多年，但積金局數字顯示，截至今年6月底，強積金個人賬戶有490多萬個，超過120萬名計劃成員持有多過一個個人賬戶，每多一個賬戶就增加整體行政開支，打工仔冇着數。所以新短片中4位積金英雄就傳授秘技，教授整合賬戶、善用自選安排同轉移強積金嘅潛在風險，每集片長約2至3分鐘，今日開始喺巴士、YouTube同積金局網頁播放。