旺角朗豪坊係年輕人蒲點，做得呢個場嘅管理層，跟得貼時代步伐好重要。冠君產業信託（2778）行政總裁李澄明噚日出席業績記者會，入場時佢攬住一袋「梳乎蛋」紀念品，在場有記者馬上興奮叫出嚟：「蛋黃哥？」
估唔到現年63歲嘅李澄明，對呢隻新Sanrio卡通公仔都十分了解。
噚日佢仲喺業績記者會上解釋，「蛋黃哥」其實喺由冠君旗下商場朗豪坊嘅同事介紹引入嘅，創作理念係源自時下日本年輕人想hea吓hea吓、懶懶閒咁，朗豪坊同事仲幫佢改過個名做「梳乎蛋」。
呢隻公仔對香港人嚟講咁新，朗豪坊啲展覽又成日更新，難得李澄明可以對咁熟書，華華都好佩服。
佢又透露，搞呢個橫跨暑假嘅展覽，耗費400萬元，全年會投入超過2,000萬元做推廣，明年仲會使多啲錢，唔知李澄明下次會否親自物色新公仔做宣傳呢？