中共領導班子每一屆任期為五年，期間要開七次中央全體會議，每次所傾嘅議題一早已固定，幾十年來都冇變化。中共即將喺10月開五中全會，按規定，會傾十三．五規劃。有江湖傳聞話，中央喺之前一定要搞定國企改革方案，成為呢兩日國企改革概念突然炒起原因之一。
按中共黨章規定，一中全會確定黨內領導班子，二中全會就確定國務院領導班子；黨、政人事固定後，三中全會就傾經濟改革，然之後到四中全會，就傾行政改革或者黨內改革。四中全會去年10月已經開完，習近平會後宣稱，要依法治國。
今年10月的五中全會，係習、李任內，最後一次以中央全會形式講經濟議題。因為按慣例，之後的六中全會將專門講精神文明或文化，最後一次的七中全會，就會用來總結任內得失，全部同股市無關。炒A股等於炒政治，開完今次五中全會後，A股可能將冇嘢炒，難怪內地股民要把握最後機會，炒埋呢轉。
黃尹華