有牛雜妹之稱嘅李美琪（Monnie）失落港姐入圍資格，卻因一篇網絡日誌，表示以爸爸賣牛雜養家而自豪，感動人心，Monnie日前同女友人去咗食韓燒，2個女人仔食咗4人份嘅食物，Monnie當日都話飽到要買消滯丸食，不過，似乎食到飽，仲去朋友搞嘅party食生冷嘢，返屋企冇耐就被送入醫院。
Monnie昨日在Instagram貼出一張打完吊針用棉花遮住傷口嘅手仔相，留言：「昨晚是我人生中一個很恐怖的經歷，第一次被送進醫院，第一次要打吊針。 謝謝媽媽和哥哥下班那麼累還一直陪在我身邊，謝謝姐姐照顧我，還有爸爸一早買了3碗粥和3袋麵包放我桌上⋯⋯ 大概我把他們都嚇壞了⋯⋯ 我答應您們我不會再不聽話亂吃東西了，我要做個健康寶寶。」
昨日本報都有向Monnie致電求證，問佢發生咩事，Monnie話：「我同friend食完韓燒之後，可能食得太多嘢，個胃已經有啲唔舒服，噚日已經覺得有啲揦住揦住，因為約咗人去party，唔記得自己唔舒服，生凍嘢又食，熟嘢又食、三文魚刺身又食，搞到自己咁。」Monnie又要指，自己嚇親屋企人，要屋企人半夜送佢去醫院，問佢當時心情點，佢稱：「初初都好驚以為食物中毒，因為我又屙又嘔得好犀利，仲要發燒，我都擔心，最尾醫生話係腸胃炎，我打咗吊針休息咗。」目前使唔使食得清淡啲，佢就話：「係呀!不過我個營養師朋友，佢就同我講依家呢個階段，唔使食得特別超級清淡，間唔中食得正常嘅嘢，食啲自己鍾意食嘅嘢放縱咗。」