般咸道嘅石牆樹，早在1949年嘅相已經見到。剛剛被斬的四棵樹，近樓梯的母樹嘅年齡分分鐘比上星期冧落嚟嘅那一棵仲要老，因為在1949年的相片中，近柏道的樹，那時比近寧養台的要高大。
而承托住老榕樹所生長的古石牆，其實唔同部份係建於不同年代的。樹後面嘅石圍欄，係1930年代建築，常見於港島半山的車路。而石牆樹真正的落腳點，是一幅1860年代的古牆，係當年開闢般咸道時，最原始嘅石牆。所以石圍欄係後加嘅，佢根本不是老榕樹嘅落腳點。政府以石圍欄有裂痕為由去斬樹，其實並不充份。
四棵樹之中，有兩棵樹後面嘅石圍欄都有曾經被修補痕迹，呢兩棵是最近牆頂地面嘅兩棵，亦是最古老嘅兩棵：母樹及第一子樹。隨住老樹不斷生長，樹幹及樹根會不斷變粗，就會向上推，令石圍欄向上曲，因而出現裂痕。所以呢段石圍欄，出現過不同時代修補過的痕迹，其實係反映老榕樹不斷生長的過程。而出現痕迹，不但不是代表老榕樹結構有問題，反而是老榕樹健康成長嘅良好信號。住在附近的街坊亦表示，裂痕已存在多時。政府今次以一條舊有裂痕，在沒有諮詢居民情況下倉卒地斬斷古樹，實在是自斷根基。百年樹木，就係咁樣被一個無情及怕事嘅政府斷送。
香港𠵱家嘅樹木「政策」，就係登記同埋檢查，但就冇注重其實樹木係有生命、會長大的，需要新地方生更多根。特別係生長於石牆上面嘅榕樹，靠氣根去抓實新嘅地方，做新支點。希望政府日後，會留意多一啲打好根基嘅方法。
張朝敦
城西關注組成員