前日天文台錄得香港130年來最火熱的36.3度，在元朗八鄉拍攝港台劇《火速救兵III》的王喜和陳國邦不但沒機會在室內地方嘆冷氣，而且還要帶備50磅重的消防裝備，在密封地方拍攝救火動作場面，由前日下午3時拍到昨日凌晨4時，結果兩人不但滿身汗臭，汗水更如瀑布般瀉出，認真「和味」。
唔夠水飲
王喜、陳國邦、金興賢、周家怡前日為《火III》趕戲，劇組更將八鄉消防訓練學校扮成工廠大廈拍火警及氣體爆炸場面，家怡被困火海，王喜和阿邦等前往營救，卻遇上香港開埠以來最熱一日。對此王喜昨說：「係我拍《火速救兵》以嚟最甘、最和味嘅一次。消防員個呼吸輔助器30磅重，抗火衣10磅，水靴10磅，加埋頭盔，全身裝備唔少於50磅。大家知道噚日天氣唔嘢小，已經帶咗好多水，監製帶西瓜嚟探班，有啲消防員太太煲埋五花茶，但我哋帶去嘅水到夜晚11點前已經全部飲晒，PA惟有漏夜去買水。」
熱了一整天滋味如何？王喜說：「套衫由朝着到晚，濕咗又乾、乾咗又濕，味道係好『清幽』嘅，我哋唔止係大量流汗，直情個個『爆水箱』，啲汗由上而下好似瀑布咁滑落，喺衫袖倒到出嚟。」儘管過程辛苦，但王喜指全組人也拍得十分開心。此外，王宗堯當日雖然不用為《火III》開工，但也有買雪條去現場探班，而周家怡的戲份前日煞科，她還試穿消防制服感受做消防員滋味！
採訪：魯吉
