近期騙徒冒認政府或公營機構呃人層出不窮，令市民變成驚弓之鳥，難分真假！噚日網上瘋傳一封抬頭由廉署發出嘅信（圖），稱「到訪不遇」，要求收信人喺辦公時間內致電兩名廉署職員聯絡，引起網民熱議函件真偽，有網民斷言「假的，老廉唔會咁樣搵人」。
八方見到信件抬頭有廉署中英文名同標記，手寫填上案件編號、電話號碼同兩名聯絡人姓名，仲有發出日期及到訪時間，但致電信上號碼時又冇人聽，都懷疑係咪惡搞？
點知廉署老友向八方證實呢封確係廉署發出嘅信件，佢話有時廉署希望市民為案件提供資料但冇事主電話，就會派人上門搵人，若對方唔喺屋企，會留下信件，要求對方聯絡。對於有關電話無人接聽，老友話：「話明係辦公時間吖嘛，星期日又點會有人接聽」。佢仲話如果市民接獲聲稱由廉署人員發出嘅信件，可致電廉署24小時熱線2526 6366核實真假。