【壹週刊】田北俊在網上人氣高企。一張四眼懵豬相、加句「邊有咁多陰謀論啊，主要係人蠢無藥醫」，獲得四萬個like，多過他在新界東的得票，「希望建制派朋友唔好太介意。我哋facebook啲嘢，講明係想接觸啲後生。」他笑騎騎，勸政界耆英不要對號入座，忘了自己亦已六十有七。田少的facebook有專業團隊管理，成本比光顧五毛高得多，別人學不來。
猶記得○三年，他臨陣倒戈，令廿三條拉倒。翌年挾光環參加立法會直選，首次落場便報捷。如今抽乾了維港，是為了明年的選舉揭開戰幔？「未決定，我夠鐘退休，（自由）黨就話最緊要贏番個位。睇埋區議會選舉先。」就算他退休，仍然有水可抽。《100毛》邀請田北俊加盟，田少回應：「人工係咪高過劉華？」他當然不缺錢，只係戥納稅人不值，「劉江華唔係做局長，邊個會俾三十萬人工請佢？梁振英想佢部署區議會和立法會選舉，想踢走泛民，係一廂情願。佢係咁叻，自己都唔會選輸啦。」