一日之計在於晨，食個靚早餐十分重要，營養師都教，即使減肥都要食早餐。中電（002）企業發展總裁莊偉茵過去十幾年都習慣陪住兩位寶貝仔在家食早餐，直至近年，兒子先後去澳洲讀大學，佢先至開始每星期一、兩次跟老公周圍去茶餐廳，搵靚鴛鴦（16元）、菠蘿包（6元）做早餐。
莊偉茵平時習慣在家食燕麥加乳酪、再加一個奇異果做早餐，健康到不行，因此佢笑住形容，呢份鴛鴦、菠蘿包早餐做「邪惡早餐」。
老實講，香港地，周圍都可以飲到茶餐廳嘅奶茶、鴛鴦，但未必間間嘅出品都啱口味，莊偉茵偏好奶味較淡、茶啡味偏濃嘅鴛鴦。佢跟老公尋覓多時，試過好多間茶餐廳，先至喺旺角康年搵到佢嗰杯鴦。
佢事業心重，當然唔止食早餐咁簡單，佢以前係國泰航空（293）大公關，2012年過檔中電之後，除咗公關工作，仲要負責社區關係、市場及客戶服務，呢兩瓣工作都要佢多啲時間接觸人。
佢每次去茶餐廳，就會一邊食早餐，一邊留意身邊食客傾啲乜，了解大眾關心嘅話題。更重要係，食肆係中電其中一個大客仔，佢可以順便了解茶餐廳嘅營運模式，幫手想方法替對方慳電，認真唔話得。
記者：高淑嫻