話說我這個宅女一天嗌外賣的時候，店員很正常的跟一句：「跟乜嘢飲呀？」而我也很慣常的回答：「可樂啊唔該。」
外賣到了，小妺發現罐上刻着我N年前舊男友的名字，他早已移居外國，而我跟他也已經成為好朋友，於是忍不住發了一個短訊給他：「喂，我抽到有你個名嘅可口可樂啊！」「真係㗎？點抽㗎？」「冇呀，我嗌外賣，自動送上㗎！嗱，我影低張相畀你，你可以用嚟做profile picture啦！」「喂，正喎！幫我keep起佢啦！」「得啦！」
單身非常自由
然後跟這位很久沒有閒談的好友吹起水上來：「點啊？最近拍拖拍成點啊？」「拍拖？邊個呀？」「呢，上次你喺蘭桂坊飲醉酒，我扯你上的士送你回家的時候，被你女友的朋友在翠華發現了我們，還以為我們拖着手歡天喜地跳來跳去截的士，第二天要你向女友解釋那個女子就是我，好彩她認識我，你才不至於人頭落地！」
「喔，嗰個散咗好耐啦！我兩年幾冇拍拖啦！」「咁你呢？」「哈，我三年幾喇！寧缺莫濫呀嘛！同埋我覺得𠵱家自己一個人生活得非常快樂、安穩、開心，想做乜就做乜，想幾時食飯、幾時瞓覺都冇人管，出街扮靚啲又唔使俾人問長問短，自己賺到錢就自己使，非常自由！」
兩人理念相同
「嘩！全中呀！估唔到咁多年後，我同你嘅理念竟然係一樣啦！我已經怕了『拍拖』這兩個字，成日都要估佢個心諗緊乜！估唔中又鬧，估中又話你唔做，真係好煩！又要鬧交、又要冷戰，好影響心情㗎嘛！你仲慘啦，咁多工作做，好影響工作質素㗎嘛！我覺得只有病、或者嚴寒凍得緊要，你才會想想要找一個伴侶在身旁。」又是真的！「不過你有這麼多好友照顧你，不用找個男人來煩自己了！對嗎？」
小妹記得自己看過小嫻姐（張小嫻）的一段散文，內容大概是說：「我一個人的生活已經非常快樂、安穩、圓滿，若要加多一個人在我的生命上，他必須給我更多更多更多更多的快樂。」「對呀！但現在負能量的人實在太多了，你很難會找到一個正能量使者陪你！剛剛拍拖時當然會很開心，但過了一陣子，必定開始鬧交、互相傷害大家，總之就唔開心多過開心啦！」
解不開的謎底
其實我倆是否一直都遇人不淑呢？但遇人不淑某程度上都跟待人不淑有關！愛情這回事，連霍金都解不開謎底，我們還是避之則吉了！
真的估不到當年跟這位男友鬧交鬧到拆天，事隔多年後，大家會有着同一個理念！感覺很有趣、亦很親切。我們都要自由！
風人院
撰文：杜如風
旅遊節目：《流行東京1,2》阿四，《風行全世界1-5》幕後黑手，《流行首爾》 眾矢之的。著作：《風行系列1-7》
本欄逢周日刊登
