【飲食籽】睇英超食乜好？最強零食速報！
即係咁，英超開鑼啦！好波連場，咁睇波時梗係要搵返啲啤酒同口立濕咬吓啦。我哋飲食籽當然要趁住呢個機會掃吓各大超市便利店，幫波友們精心挑選幾款啱用嚟送酒嘅小食，各位記得入定貨啦！
記者︰黃依情
攝影︰陳永威
三幸堅燒柿之種辛辣黑胡椒味花生$18.5。有花生，有脆脆米，仲要係惹味嘅黑胡椒味，一大包有六包獨立細包裝，唔怕食唔晒。（759阿信屋）
金必氏粗鹽味燒枝豆小食$9.8。日本人鍾意食枝豆送酒，但呢款唔使剝殼咁麻煩，鹹鹹哋，卜卜脆。（759阿信屋）
湖池屋檸檬鹽味薯片$10.9。捱夜睇波，梗係要食返啲酸嘢醒醒神，檸檬味係最佳選擇！（759阿信屋）
品客甜酸雞醬味薯片$12.9。眾樂樂睇波，一包薯片點夠，一筒就差唔多啦，老牌薯片品客咁啱有新口味，酸酸甜甜似足食麥樂雞。（各大超市）
（左起）嘉魯達飛鷹蒜味萬里望花生$11、Rotary辣味小春卷$16.5。睇波食花生是常識吧！東南亞食品店員工極力推介呢兩款小食，花生帶蒜香， 春卷帶微辣，食唔停口。（營多）
（左起）完熟葡萄酒$12.9、Kuos啤酒味碳酸水$18。做女友嘅好多時都要陪男友睇波，唔想半夜三更飲啤酒咁齋，可以試吓飲葡萄酒或者啤酒味嘅有汽水，清清哋都唔錯。（Circle K便利店、Aqua Plaza）