前晚新城國語力頒獎禮，雖然頒咗95個獎，但由於英皇同環球嘅歌手都冇到，令到場面有啲星光暗淡。當中有出席嘅周柏豪做訪問嗰陣，被記者笑佢擔大旗，已經算係大星，佢即時話：「吓！都唔算，自己喺台下面都欣賞好多人嘅表演。」
提到好多英皇同環球嘅歌手都冇到，問柏豪覺唔覺得今晚頒獎禮好失色？佢就話可能大家都忙，對於傳聞話英皇同新城不和，佢就唔願多提，話唔清楚其他公司嘅嘢，希望大家都一團和氣咁話。問到今晚冇乜朋友同場，柏豪就話都有好多唔同地方嘅歌手出席，例如係台灣嘅過江龍汪東城（大東）。
講到大東自然唔可以唔提，大東同周柏豪嘅微妙關係。周柏豪話雖然唔識大東，但就諗起大東同自己一樣，都係女性衞生巾嘅代言人，睇嚟柏豪真係好留意姨媽巾市場動態。咁難得兩位樂壇大姨媽同場，問佢會唔會同大東交流心得，睇吓邊隻牌子嘅M巾比較好用？柏豪即刻話：「梗係我嗰隻好用啦，因為我代言嘅，梗係話我嗰隻好用㗎啦！」果然係一個稱職嘅M巾代言人！
跟住柏豪又主動提起自己之前喺facebook貼相話電話mon爛咗，佢話有好多網民好有記性，仲記得佢5年前爛杯嗰件事，又話每次有乜事網民都會幫佢改名，大文豪、M巾豪等等，其實......玻璃碎嘅形態咁靚，又真係好難令人唔記得嘅！