日本通C君早年留學慶應大學，在船王公司服務時，又常與日本船東、造船公司、物流業打交道，再娶埋日本太太，想話佢唔係日本通都唔得。C君自船公司退休後，住日本半年，住香港半年，最近靜極思動，俾日本朋友搵佢東山復出，做中日港三通橋樑，引導日本公司來港，不知可否成事。
C君話日本人口減少，本土市場萎縮，傳統日本公司以往幾代人做大公司（如三菱、三井、住友）嘅外圍衞星供應商，已經生意不愁，但現在唔得咯喎，新力衰退、聲寶破敗、三洋俾Panasonic併購、日立做假數……於是啲傳統中小企公司急謀出走海外，希望進入中國大陸市場，而香港就係跳板，如一下子就到上海開檔，恐怕難以適應內地法規及人事關卡呢。
C君話普遍日本人今天心情好矛盾，理性上知道要做中國人生意，情感上就接受唔到，佢最近在福岡住咗十日，與不少地方中小企接觸，發覺到福岡市面十分清淨，如無強國遊客，基本上就係市面蕭條。佢在福岡期間，上海有幾千遊客到咗，搞到全部旅遊巴被搶訂一空，識少少普通話之人都去咗不同商店做繙譯。表面上日本人對強國客打恭作揖，笑面迎人，但實際上，在地鐵有強國客大聲講電話，曾被日本人在後大力碰撞，又有人指罵拖喼客，幾乎個個都討厭強國客食煙、嘈吵、粗魯之行為。
地產L本想下個星期去福岡，聽見C君咁樣講，不禁窒一窒：「咁我地香港人去，怕唔怕㗎。」C君話：「你唔好太嘈就得㗎嘞，日本人識得分嘅，分得出香港人、台灣人與大陸人，佢地對待香港人係好啲嘅！」咁就幾好，不過有啲香港遊客去到外地，如三五成群聲音一樣係咁嘈吵，唔會好得過大陸人幾多啫。C君介紹公子L在福岡一帶租車自駕遊，最遠去到長崎。南下就坐子彈車去鹿兒島，再去指宿，大分。如果多啲時間再去埋東部，否則就北上返福岡購物，打道回府返香港。貪心啲，去東京行街一日先至返香港呢？C君話：「咁就貴好多咯，無論坐飛機或子彈車由福岡去東京，費用都唔平，而且福岡入，東京走，機票都貴啲，制唔過。」此乃旅行常識，如果唔係好有米，無謂咁豪，指望日本人分清楚香港遊客與大陸遊客嘅分別仲好過。