上周六全城球迷焦點都喺英超開鑼，其實都仲有一場意甲前哨戰，意大利超級盃喺上海上演，上季雙料冠軍祖雲達斯對住拉素，結果由兩名新兵建功，以2:0贏波捧盃。
兩隊喺今季都有新10號仔，祖雲達斯嘅保羅普巴同埋拉素嘅菲臘安達臣都轉咗着呢個號碼。祖記過去兩季嘅進攻主力泰維斯走咗，艾華路莫拉達又因傷缺陣，今場波就由新加盟嘅文迪蘇傑擔正。呢位克羅地亞前鋒喺上半場表現唔及得對手嘅老將高路斯，兩隊半場互無紀錄；到下半場25分鐘終於打破僵局，文迪蘇傑接應史杜拿路傳中一頂入網。另一位喺今夏加盟祖記嘅前鋒，下半場入替嘅保羅戴巴拿喺75分鐘亦入一粒，為祖記奠定2:0勝局。除咗兩名入球功臣，𠵱家祖記鋒線仲有莫拉達、洛蘭迪同埋今場波正選嘅小將京士利高文，正選位爭逐好激烈，唔怪得盛傳洛蘭迪即將走人。