2009東亞運足球金牌功臣之一嘅守門員吳逸凱（右二），前季掛靴後改行做體能教練之餘，仲將戰場轉至健美界。佢噚日就喺灣仔修頓，參加香港健美及運動體適能總會主辦嘅男子運動模特錦標賽1米80或以下組別賽事，仲有梁金輝同馮啟匡等前球場戰友專程嚟捧場。
不過，原定下晝三點幾開始嘅比賽，要押後到差唔多六點先開賽，卒之等到着住條紅色短褲嘅阿凱型爆登場！以初次參賽嚟講，阿凱嘅表現其實都算唔錯㗎，但佢最終喺五名選手入面排第四，冇獎盃落袋。阿凱賽後都幾失望，話自己準備咗八個幾月，時間就唔算長，因為肌肉要長時間鍛煉先有成果，總之今次戰果唔會影響佢將來繼續參賽喎。