「男神」失威！出爐百米飛魚、中國嘅寧澤濤，上周五喺喀山游泳世錦賽參加50自，帶病下準決賽出局。同日另一個焦點，就落咗喺世錦賽史上最年輕泳手、巴林10歲小妹妹塔莉克（Alzain Tareq）身上。
上周四歷史性成為男子100米自由泳世界冠軍嘅寧澤濤，第二日出戰50自就即刻失威，預賽只係造出第14快嘅總成績「掹車邊」晉級，去到準決賽就游出22秒28，無緣決賽；喺100自決賽包尾嘅倫奧冠軍艾安恩，今次就成功反彈，以首名入決賽。
巴林10歲妹妹cute爆參賽
由於寧澤濤游完100自，第二朝就要緊接游50自預賽，部份強國傳媒就將男神失利歸咎於賽程安排太密喎。另外，有記者留意到男神背脊有好多拔罐痕迹，寧澤濤就話游完100自當晚，腸胃唔係幾舒服，但強調呢個小毛病冇影響到佢游50自嘅表現，仲話呢個時間同自己賽前預期差唔多喎。
至於巴林10歲小妹妹塔莉克，同日參加女子50米蝶泳預賽，錄得41秒13嘅全日最慢時間，但都成功以10歲之齡創下世錦賽最後生參賽者嘅歷史。佢噚日轉戰50自就游出35秒78，都係預賽出局，但佢話明志在參與，目標係2020年嘅東京奧運。
至於港隊小美人魚何詩蓓噚日出戰50米自由泳初賽游出25秒85，排名37，亦只係達到奧運B標；而隊友江忞懿出戰女子50米蛙泳，就以32秒72取得44名。呢兩位港將今日會聯同施幸余同歐鎧淳，喺女子4x100米混合接力初賽作壓軸一擊，只要成功殺入前12名，就可以直接拎到里約奧運入場券。（無綫網絡電視13台今日2:30pm直播）