沙特阿拉伯嘅中東呼吸綜合症持續肆虐，不過公專聯梁繼昌未驚過，前排照樣拖埋一家大細去咗中東玩，仲玩得不知幾開心。八方目測過前排先返港嘅佢，睇嚟相當健康，應該冇中招。梁繼昌話，呢次佢去過波斯尼亞、土耳其伊斯坦堡等地，沿途坐火車，日頭落車入城到處逛，夜晚就返番火車瞓，然後啟程去下一站，而車上有浴室，可以沖涼，非常方便。
原來今次旅行係因為梁繼昌嘅千金即將要去英國升學，難怪佢要做廿四孝老竇啦。佢同八方講，每年夏天嘅旅行，正係一家人共聚天倫，一齊溝通嘅好機會，話晒要互相夾好時間都唔容易。梁繼昌又同八方講，送完女去英國，9月就要提早開工，因為有條佢有份負責嘅草案，9月已經要開會。