【本報訊】英超今晚開鑼，首場賽事由曼聯大戰熱刺。開賽日撞正蘭桂坊音樂啤酒節，料屆時蘭桂坊一帶人頭湧湧。有酒吧業人士估計，賽事將帶旺酒吧生意近兩成。曼聯推出的新球衣熱賣，已退役的萬人迷碧咸7號球衣最受歡迎。
曼聯波衫熱賣
蘭桂坊協會董事方亮璇稱，除英超球迷外，今晚也有參與啤酒節的市民到場，料人潮會由晚上7時一直至深夜，已聯絡警方維持秩序，估計附近一帶酒吧生意額會上升10至15%。有酒吧業人士指，每年英超開鑼均令生意上升近兩成，「香港球迷睇英超多啲，認為酒吧氣氛好」。
紅魔鬼曼聯今季推出adidas品牌新球衣，adidas指新球衣推出市面僅一周，暫未有確實銷售數字，但球季開鑼應刺激銷量。旺角球迷世界球衣專門店店員指，目前球衣銷量第一是曼聯，其次是車路士及阿仙奴，早前碧咸穿上曼聯7號新球衣拍照，並將照片上載到社交網站，「最好賣係呢件，啲人見到佢着，咪衝去買囉」，一件售價約700元。
■記者伍雅謙