【壹週刊】本來被王晶睇中，有得拍《賭城風雲2》嘅王君馨，要拖到續集先得參與，全因髮型累事。
有知情者透露，當日大台唔肯放人，唔係針對王晶，而係想懲戒唔聽話嘅王君馨。王君馨參加《星夢》後，簽約星煥唱片，話事人Herman（何哲圖）唔鍾意佢短髮，話太男仔頭，要佢留番長，點知君馨表面溫柔，骨子裡其實好硬頸，死都唔肯留長髮。Herman就如翻版金正恩，邊個唔聽佢話就冇得撈，所以君馨到依家都冇碟出。
唔止激嬲高層，王君馨仲連同公司傾合約都拖拖拉拉，所以過去成年只拍得兩部劇。其中一部《老表，你好Hea！》都係因為教友王祖藍幫口，君馨先有機會拍。
不過咁，依家有王晶撐腰，拍完《賭城3》，仲要用王晶經理人公司嘅伍允龍合作，拍電視劇《城寨英雄》，玩突破做打女。喺電影記招舉行當日，王君馨仲先去為美容院擔任嘉賓。依家搵到靠山，王君馨鍾意點set把頭髮都得啦！