馬雲旗下阿里巴巴出名多嘢賣，𠵱家連北京故宮嘅國寶都賣埋，咁當然唔係真嘢嚟喇。故宮博物院為慶祝90周年，搵咗兩間大企業幫手搞旺佢，周大福（1929）以清朝國寶概念，幫手設計一批珠寶首飾出嚟，噚日開始喺阿里嘅團購網「聚划算」上面賣。
呢批產品符合晒強國人好鍾意金嘅特質，好似「玉如意」、「八角盒」由足金打造再雕花，起標價要過百萬元。貴嘢唔啱口味，都有啲平平地嘅新潮故官紀念品賣，例如「八旗勇士不倒翁」、「奉旨放行」行李牌，但係好快就賣晒。
老實講，阿里嘅網購平台，最出名都係淘寶與天貓，以團購為主嘅聚划算就做埋活動推廣，阿里有時會喺淘寶揀出部份商家過去聚划算，今次透過聚划算搞故宮院慶活動，可能想谷一谷，希望多啲人留意番聚划算。