全國人大常委范徐麗泰唔係梁粉，係人都知，不過佢近期都已經少咗公開批評特首梁振英，不過唔知係咪民政事務局前局長曾德成「被辭職」單嘢，真係令人太睇唔過眼，范太噚日又再袋錢落CY個袋，勸佢「攞住個權唔需要用到太盡」之餘，仲勸佢要留番啲空間畀人，做人唔好做到咁盡。
范太噚日接受電台訪問，除咗少不免講到港大近期任命副校長風波外，難免亦講到曾德成同公務員事務局前局長鄧國威「被辭職」事件。范太都算厚道，冇指名道姓批CY，反而係苦口婆心、不厭其煩咁唔開名勸佢：「希望任何一位有權力嘅人士，攞住個權唔需要用到太盡。」
笑「蠢人」自覺好叻
佢又話知道曾德成講過想退休，認為如果同曾德成傾傾，等人可以體面離開，根本唔會搞到咁，對人對自己留一線都係好事：「因為其實你留啲空間畀大家，對自己好、對人好、對整個系統都係好。」
不過范太勸還勸，CY聽唔聽，佢恐怕心中有數，所以之後有記者問佢，點睇立法會主席曾鈺成話，嗰啲政府中人抹黑兩名前局長係「蠢到不得了」，范太笑笑口拋低一句：「我諗做嗰個人覺得佢自己好叻㗎。」正如有官場中人同八方講，呢句真係點出晒CY個性同做事手法，你以為件事佢搞到一鑊粥，民意反彈，佢反而覺得咁先叫立威、先叫做領導人，你話點搞？
李八方
mailto:[email protected]