市值62億嘅內地鞋股千百度（1028）噚日中午出新聞稿大鑼大鼓公佈，獲得有「期權之父」之稱、1997年奪得諾貝爾經濟學獎嘅邁倫．斯科爾斯（Myron Scholes）入股，可惜公司講啲唔講啲，又唔講清楚Scholes究竟買入幾多股份，需知道1手又係入股，100手又係入股喎，所以呢，呢個消息出現之後，市場都冇乜反應，公司股價冇郁動。
有睇金融書嘅人一定知道Scholes與學者Fischer Black共同發明嘅期權定價模型Black-Scholes model。Scholes今年都已經74歲，佢前年年底曾經來過香港，獲城大頒授榮譽博士，之後佢亦有向城大師生講佢對環球經濟嘅睇法。佢𠵱家係史丹福大學榮譽教授。據講，佢有研究中國經濟，不時到訪中國，唔知千百度會否邀請佢來港呢？