國泰同港龍噚日搞咗個「Betsy Awards 2015」頒獎，嘉獎表現優異員工，一共有16名員工和5組機組人員獲獎，好多獲表揚員工，其實都經歷好多驚險事，好似國泰機艙事務長潘美美（Salina）咁，佢就係3萬呎高空，30秒內拯救咗20個月大BB女嘅生命。
一邊擋媽媽 一邊心外壓
事緣今年2月飛杜拜航班，佢見到BB食朱古力餅鯁親窒息，危急之下佢從個媽媽手上搶咗BB做人工呼吸，點知印度籍媽媽想搶番BB，但Salina右手做心外壓、左手擋住媽媽，把口仲要安慰兩夫婦。30秒後女嬰呼咗一大啖氣，終於呼吸到。佢先發現自己條脷食到甜甜哋味道，原來係人工呼吸吸出嘅朱古力餅碎，但味道再甜，都甜唔過救番一條生命嘅喜悅。
另外機場顧客服務主任馬慧儀和唐嘉銘就好窩心，15分鐘神速幫3位加拿大遊客補辦去越南簽證，終於趕得切上飛機，佢哋全部都係「Betsy Awards 2015」獲獎嘉許。