大家好，今日要同大家介紹一套不能錯過嘅電影，原因唔係因為《職業特工隊》，英文戲名係《Mission Impossible》，而係因為你始終覺得難以置信，點解明明湯告魯斯(Tom Cruise)已經53歲，但點解佢赤裸上身果陣，依然肌肉一嚿嚿，佢個型樣，依然咁型！你話世界係幾咁公平！
睇完前幾集嘅密室吊威吔、單手攀岩石、跳出杜拜摩天大廈後，最新一集嘅《職業特工隊：叛逆帝國》(Mission Impossible: Rogue Nation)，最大賣點可以話係加插咗中國演員張靜初，先唔好問，係咪因為阿里巴巴背後注資先加插張靜初，最緊要係如果唔落足眼力，數完一二三，張靜初嘅三個鏡頭同埋一句聽唔太清楚嘅英文對白，佢嘅戲份就咁完結，唉！仲要同湯告魯斯冇對手戲！哈哈........
其實入得戲院，都係想睇湯告魯斯今次又想點挑戰大膽，點同死神玩番鋪，咁佢當然冇令fans失望，喺5,000呎高空徒手捉實架A400M軍機機門，拍果陣安全設備，只係一條安全帶，所以千祈千祈唔好遲到，萬一遲咗入場，就.........哎呀一聲，繼續睇落去囉！
因為錯過湯告魯斯徒手捉機門，話都冇咁快，去到故事中段，就會見到湯告魯斯又想同死神say hi，佢要由數十米高，跳入水塔下嘅冷凍系統，拍攝時他要喺冇輔助工具下閉氣潛水3分鐘，換咗個敵方陣地嘅認人程式，結果~當然又係將不可能嘅任務完成，然後？然後咪係喺一連串嘅飛車、追殺、陷阱之後，捉咗今集終極大佬，太容易？！無他嘅，佢係湯告魯斯嘛！