張栢芝同謝霆鋒喺11年離婚嘅時候，發過一次聯合聲明，噚日佢哋透過霆鋒經理人霍汶希（Mani）嘅微博，為咗一對乖仔謝振軒（Lucas）同謝振南（Quintus），再次發出「謝霆鋒及張栢芝聯合聲明」。事緣喺日前有報道指栢芝決定帶埋囝囝從新加坡回流返港，要託教會朋友幫手，搵學校收佢兩個仔讀書。
入讀國際學校
聲明入面指Lucas同Quintus都係自動辦理退學手續，同時又指「作為父母，栢芝與霆鋒雙方一直在所有居住、教育、旅遊等等事情上均是早有共識及雙方同意下進行。」當中又指栢芝幾年前已經幫兩兄弟申請入讀International Christian School，不過當時學校冇學位，直到今年先成功考入去呢間學校。聲明又指栢芝好感激霆鋒支持及關愛一對孩子。最後仲話佢哋會搬返嚟香港住，可以多啲時間同爺爺嫲嫲、阿公阿婆見面，希望大家為小朋友着想，唔好騷擾佢哋嘅校園生活。
撰文：馮仁昭
