白鴿黨主席劉慧卿剛去完菲律賓馬尼拉，同菲律賓政府官員會面，反映香港外傭待遇問題後，就因為《蘋果日報》早前一篇報道，入咗菲律賓監獄。大家唔使擔心，因為卿姐呢次「入獄」，其實只係探監，話說卿姐噚日返港開記招後透露，喺菲律賓涉藏毒被判囚40年嘅港人鄧龍威，喺獄中睇到《蘋果》報道，知道卿姐將到訪菲律賓後，即透過傳媒求見卿姐，卿姐一口答應，去到菲律賓就去New Bilibid高度設防監獄探鄧龍威，再留低張卡片畀佢，叫佢可隨時搵自己幫手。
卿姐又話，此行同下周印尼之行，全部都自己出錢，冇攞任何津貼，相信隨時10萬蚊至得，貴到離譜，但幫到人都值得喎。