中央暴救市已經接近一個月，係時候嚟個中場統計（或者係全場都未定），根據高盛估計，入咗市嘅資金應該有9,000億元人仔，包括證金自己買嘅、透過大型基金買嘅，同埋由證金貸款畀券商買嘅。
而大陸亦有媒體計過，截至而家，證金已經成為最少20間公司的十大持股股東之一，個別股權分散的公司更已成為其最大單一股東，呢個數仲未計借錢畀券商同透過基金買嘅持股。
國家隊入市只係救市其中一招，其他公安緝拿惡意沽空，禁止場外融資，不准即日沽空以及限沽令等，對市場即時影響，只可以從成交中見到，滬深兩市成交由5月中高峯近二萬億人仔，縮到噚日得返7,000億元多少少。
市場參與者方面，除咗以上被限制行動嘅人士或法人之外，A股最主要市場參與者──老散，《華爾街日報》引述中國證券結算資料顯示，內地持有股票的零售投資者戶口數目由6月底的7,500萬戶下降至5,100萬戶，即係話有近三分之一散戶（即超過2,000萬人）已經散水。而外資本身進場不多，經過今役之外，雖然未見正式統計，但從常理推論，都應該所餘無幾。
多重限制之下，市場參與者減少，市場「穩定」落嚟係必然（都無人玩），但講退市真係言之尚早，今次中央出手咁重，退市之前，有海量緊急措施需要取消，才可以談成立基金讓國家隊撤退，在取消這此非常措施之前，又要先待市況真正穩定，相信冇番幾年頭呢個市都係退唔到。
流氓