【拆局】
亞視前高層梁家榮獲任命做廣播處長,不少傳媒人甚至港台中人也說:「起碼好過周融!」不過有熟識梁家榮的傳媒人及前亞視中人認為,梁或許表面上「好過周融」,「但佢亦唔係嗰啲會為新聞自主同上面頂嘅人」,特別是他與北京、中聯辦一向「有偈傾」,相信他主政後,未必會即時向港台「開刀」,「但會扭到港台變成只許小罵大幫忙」。
有傳媒人及前亞視中人稱,梁家榮雖然是行內資深人物,統領過不少機構的新聞部,但他與不少主流新聞機構主管一樣,「政治立場比較保守、傾向親政府、同北京關係唔錯」,他出任亞視新聞及公共事務部高級副總裁時,有傳不少中聯辦官員均與他有溝通,「北京、中聯辦可以放心畀佢睇住亞視新聞部,諗都諗到一定要愛國愛港喇!唔通會畀個支持泛民嘅人做免費電視台新聞部阿頭咩」。
或用技術方法河蟹節目
另一傳媒中人相信,梁家榮任命必定得到中央默許、特首梁振英同意,確保政治上可以「過關」方可成事,「所以港台中人唔好有太多不必要幻想」。
亦有認識梁的政界人士指,梁家榮在傳媒有一定江湖地位,相信他縱使有「任務」在身,「相信佢唔會明刀明槍向港台啲節目開刀,因為咁太難睇,但可以用其他技術方法河蟹,將港台節目變到小罵大幫忙,咁樣咪一樣可以完成任務」。
另外,有消息指梁家榮持有外國護照,質疑他是否廣播處長合適人選,本報就此向政府查詢。政府發言人回覆時未有正面回應,只稱在政府任職的公務人員,必須是香港特別行政區永久性居民,而是次聘任符合有關永久性居民身份的規定。
■記者莫劍弦