差唔多4年前嘅電影《那些年，我們一起追的女孩》，教識好多人乜嘢係放天燈。不過放天燈並唔係柯景騰同沈佳宜嘅專利，佔中發起人之一嘅陳健民，噚日就孖住港大政治及公共行政學系教授陳祖為一齊放。
陳健民噚日喺fb放相，po咗佢同陳祖為一齊去到台灣十份放天燈，佢哋兩個仲着到情侶裝咁款，都係淺藍色polo恤。陳健民就留言話，「十份放天燈，我和陳祖為的共同願望」，咁願望係乜嘢呢？好易估啫，天燈一邊就寫住「我要真普選」，相信係陳健民手筆喇，至於另一邊嘅願望就係「保衞港大」，肯肯定係陳祖為㗎喇。見到佢哋兩個將天燈徐徐放上天，八方都衷心希望佢哋嘅願望可以成真。