做埋今個月嘅數碼通（315）總裁黎大鈞差唔多一年冇公開露面，噚日現身介紹手機支付平台KISS，佢冇吻別大家，但就畀大家一個驚喜，原來佢匿埋減肥，𠵱家身形比起4、5年前明顯瘦咗成個圈，着埋黑色衫，感覺更清減。
黎大鈞主要靠節食減肥，而唔係靠做運動，所以瘦身成功應該同佢成日喺辦公室做太極冇關。華華聽聞，過去一段時間，佢中午只食沙律做lunch，非常清淡，唔知係咪因為佢近排要籌備呢個KISS項目，搞到冇時間大魚大肉呢？
雖然睇落瘦咗，但佢就話磅數冇變過，仲笑住話自己不嬲都弗，似乎佢啲脂肪變晒做肌肉喎。
講番呢個記者會，傳媒最期待嘅畫面「黎大鈞又寸記者」最後冇出現，主要因為現場不設答問環節，搞到唔少準備咗尖銳問題嘅傳媒朋友非常失望，唔可以再一睹佢「金句王」嘅風采。