喺俄羅斯喀山舉行嘅世界游泳錦標賽進行得如火如荼，中國嘅領軍人物孫楊周三就成功衞冕男子800米自由泳，連贏三屆，賽後又激動到喊，游完三場決賽喊足三次。
前一日喺200自衝金失敗而眼紅紅嘅孫楊，周三返到去個人主項、衞冕嘅800米，都唔係完全冇壓力㗎，場決賽一直由意大利嘅柏連尼利領先，不過開頭游得太hea嘅孫楊最後100米發揮後勁，最終以0.85秒壓過柏連尼利，有驚無險第一個掂池，攞到個人今屆賽事第二面金牌；澳洲新星賀頓就獲得銅牌。
連續三屆贏到呢個項目，孫楊就繼早前贏出400自同喺200自失金之後，今次又再流下男兒淚。不過，感觸之餘佢梗係唔會唔記得表露愛國之情：「今場比賽好艱難，但我賽前就有信心會實現三連冠──唔只係為自己，更加係為中國男子游泳選手，自09年羅馬世錦賽後連續第四次贏到呢個項目（09年800自冠軍係張琳），將榮譽留番喺中國。」
何詩蓓100自僅達B標
至於港隊小美人魚何詩蓓出戰100米自由泳初賽，游出54秒95排名18，無緣準決賽，亦只係達到奧運B標（56秒34）。之後佢夥拍鄭莉梅、歐鎧淳同施幸余出戰4x200米自由泳接力，以8分06秒51排名14，亦未能以頭12名直入奧運。港隊周五繼續有男將謝旻樹出戰，喺50米自由泳初賽爭取達到奧運A標。