最近忽然多咗直升機show，有人話豪花幾十萬租直升機求婚，有公司打蛇隨棍上，跟手就話推出直升機平租服務，都唔知裏面究竟係葫蘆賣乜藥。不過既然大家講得興起，做茶餐廳嘅太興都唔執輸，今日搞活動都話要出動直升機，認真巴弊！
太興將產品帶上飛機，今年初開始為香港航空嘅商務艙設計飛機餐，家陣就去埋香港機場開分店，佢哋仲諗住發大去搞，要擴展亞太市場。
其實太興自2011年開始陸續喺新加坡樟宜、上海浦東、海口美蘭、北京首都等幾個機場開咗分店，諗住畀多啲外國人認識，上月底就喺香港機場開埋。佢哋諗住之後繼續開分店，於是今日搞個「擴展亞太機場宏圖」啟動儀式。
為襯番呢個機場宏圖主題，太興老闆陳永安專登租架直升機，由香港某處飛去尖沙嘴半島酒店開記者會，食正最近呢個直升機熱話喇。