阿爺啟動暴力救市，幾萬億托市籌碼，全部交予中國證券金融公司操盤，令呢間之前幾乎冇人知的公司，一下成為市場焦點，而董事長聶慶平就被稱為救市隊長，成為內地股壇最巴閉人物。A股呢輪股災禍起孖展，唔講唔知，聶慶平正是孖展制度總設計師，可以話係真正跌市元凶，而家賦予救市重任，簡直係絕大諷刺。
證金公司成立於2011年，原本只係提供資金俾券商做孖展業務，作用類似券商的央行。聶慶平之前擔任融資（即孖展）融券（即沽空）工作小組辦公室主任，負責制訂整個規則，證金公司成立後，就過檔擔任董事長。中證監7月初修改證金公司章程，可以直接買賣股票，成為國家隊主力。
聶慶平今年3月曾發表文章，話孖展制度冇問題，對孖展推動的牛市唔需要擔心，令中證監對壓制股市泡沫放軟手腳。言猶在耳，A股6月冧市，照計聶慶平應該被追究責任，但反而被賦予重任，阿爺思維真係好難用常理去理解。
黃尹華