中環在線:累𡃁模損手股新確主席閃電辭職 - 李華華

中環在線:累𡃁模損手股
新確主席閃電辭職 - 李華華

市傳曾經累到一班𡃁模輸大錢嘅新確科技(1063)話,主席朱曉冬即日拜拜,呢位主席認真「短命」,佢舊年底先做新確董事,今年4月中(港股大時代期間)升任主席,至今4個月左右就話拜拜。佢辭職嘅原因好勁㗎,係「因近期需投入更多時間積極從事中日友好事業」,想幫手搞埋外交關係㖭喎。
炒鬼一定認識新確科技,呢隻股今年2月仲係0.2元,之後話同銀聯電子支付有合作,又以0.245元配股,跟住食正港股大時代個勢喪升,5月高見1.51元,市值超過200億元,相當誇張。但隨住港股急瀉,新確亦大插水,上月8日恒指跌2000點當日,新確跌到七個一皮,噚日收報0.245元,市值得番38億元。
根據年報,朱曉冬曾為上海安欣創辦人,呢間公司係一個結合網上支付與動媒體服務嘅財務平台。或者佢諗住為中日關係再搞另一瓣業務啩。