民建聯女當家李慧琼話，如果將張德江挺特區政府講成挺梁連任係「過份演繹」，似乎凸顯中央仲未押注CY做下屆特首。而喺CY寶座不穩之時，外界再盛傳，有人雄心壯志選特首。呢個人就係份量十足的商務及經濟發展局前局長馬時亨。
其實肥馬要選特首之說，時不時都傳，點解近來又被炒熱？有政界中人話事出非偶然。佢話自從習近平同曾俊華握手後，中央明顯有一個姿態，就係無論曾俊華係咪願意做特首，北京手上都有一啲具條件嘅特首人選，非一定要CY莫屬。新華社發稿報道CY訪京時，刻意唔提張德江五度肯定佢，明顯就係唔想外界認定中央已押注。
唔同陣營都有溝通
政圈中人梗係關注，阿爺係咪另有心儀之選？繼而開始有消息傳出，呢陣子嘅肥馬好活躍，唔通就係中央其他人選？有花生友話，肥馬一直係全國政協副主席董建華愛將，當年亦係董生搵肥馬入政府；若然CY失勢，則董亦要另搵人選以造王。肥馬同政圈唔同陣營均能溝通，甚至連民主黨主席劉慧卿都可以打動，點會唔係上乘之選？
咁啱港鐵早前剛委任肥馬做主席，令人質疑佢其實野心萬丈。有政界中人就話喎，肥馬上任港鐵主席前，都同不同政界人士打招呼，會唔會因此被誤會舉動更高調，又惹佢選特首嘅遐想？姑勿論肥馬係咪真去馬，政商界中人都話佢嘅政途，點只港鐵主席咁簡單？
花生友
周二、四刊出