數碼通（315）「金句王」黎大鈞今個月底就last day，離開呢間佢效力咗接近20年嘅公司。電訊界少咗一標誌人物，香港電訊（HKT，6823）董事總經理艾維朗點睇呢？佢噚日喺中期業績會就大讚黎大鈞，指佢係一個好好嘅競爭對手，但就唔評論佢個人表現，同埋佢走咗之後對數碼通嘅影響嘞。
黎大鈞今日就會親自督師，主持以「KISS」做主題嘅記者會，推介數碼通電子錢包平台服務，雖然香港電訊7月已經搶飲頭啖湯，推出「拍住賞」，但艾維朗都冇評價數碼通嘅電子錢包，只係話各有各做喎。
今年64歲嘅艾維朗，噚日亦被問到有冇退休打算，佢第一個反應係有少少驚訝，笑住反問傳媒，係咪想佢退休，之後就話現時與員工們相處融洽，仍希望同公司團隊繼續合作，暫時冇退休計劃。