中環在線:細價樓未爆煲 湯文亮找數斥20萬福臨門請食飯 - 李華華

中環在線:細價樓未爆煲 湯文亮找數
斥20萬福臨門請食飯 - 李華華

今年2月憑「細價樓爆煲論」人氣爆燈嘅紀惠集團行政總裁湯文亮認輸找數!

筵開10席 有魚翅鮑魚

當日言論一出,惹來評論員林一鳴反駁,激到佢喺情人節當日下戰書,以6個月為期限,話在8月14日,即係下個禮拜五,若果中原城市領先指數高於136.64點就認輸,雖然尚有8日,但中原指數已升至145.48點,湯文亮已經準備拎20萬元出嚟請食飯,做找數真漢子。
湯文亮噚日話,鐵定8月14日喺灣仔富豪飯堂福臨門筵開10席,預計請120名傳媒食飯,估計每圍2萬元。佢唔肯講到時有邊位名人出席,但就一定唔會孤寒,準備咗魚翅畀赴會者漱口,同埋鮑魚填肚。對於當日挑起佢團火嘅林一鳴會唔會出席,佢就話無任歡迎。
華華問林一鳴下周五會否赴會,佢就回覆,一早已經講咗唔去,唔係冇膽識,而係唔想玩呢個遊戲,佢透過WhatsApp補充多一句:「有些人可能需要出風頭;但我真的不需要出風頭,也不喜歡出風頭。」
不過,湯文亮呢頭找數,嗰頭又再辣着火頭,噚日發表鴻文題為「三個月內,所有唱好樓市的人都會轉軚」,事關零售差、加息在即、新盤供應增加、財務公司開始追債,咁多負面因素在未來3個月內出現,「無理由樓價仲會升,我打死都唔信喇!」
咁今次仲開唔開賭局?佢就話「股票冧,啲人撻定,咁多負面因素,仲敢唱好樓市?我費事賭,請食飯,幾時都冇問題,但連輸兩次,我唔制!」


李華華
mailto:LiWaWa@AppleDaily.com