康宏理財（1019）主席王利民唔單止跑步成癮，近年亦醉心鑽研廚藝，為宣傳新推出的食譜，噚日下廚招呼一班傳媒朋友，又蝦又蟹，炒飯時仲拋晒鑊，功架十足，亦好味道嘅。
王利民透露，5、6年前先開始做煮飯公，自知起步比人慢，所以就自定一個比人高嘅起步點，「西芹炒雞柳」、「菜芯炒牛肉」呢啲簡單嘅住家菜，佢就不屑煮，要煮就煮啲出嚟呃到like嘅，好似「太爺雞」、「水煮魚」、「黃金蝦」等。
佢好鬼寸咁話「除非我咁啱喺你生日時，請你試我手藝，而你又好想好想食西芹炒雞柳，咁我咪煮畀你囉」。
佢又搞gag，話今次出食譜，係受到「自己香港自己救」嘅啟發，演繹為「自己屋企自己煮」。呢本食譜冇英文版，就係唔想讀者買咗之後，返歸叫家傭煮，咁樣享受唔到箇中樂趣㗎喎。