經過五窮六絕七艱辛之後，今個月進入業績期，周一滙控（005）打頭陣，張成績表見得人；不過，港股食粥食飯，仲要睇中外形勢。A股保衞戰打咗成個月，仍有新板斧，滬深交易所周一漏夜改遊戲規則，將融券交易由T+0改為T+1，即係禁止借貨沽空即日鮮，平倉要等多一日，沽空風險增加。
呢招比掟錢托市見效，A股沽壓減輕，但成交亦縮水，幾難大升。
睇國家隊打法，係以200日線作防線，上月9日及28日，滬綜指兩度跌至該線，隨即反彈。睇嚟A股一如美股，視200日線為牛熊線，國家隊力守以防牛轉熊。
上周四A股黑期結算，好淡雙方轉倉至本月再戰，呢兩日新加坡A50期指即月合約低水幅度收窄，昨低水165點，較周一的370點縮55%，反映淡友信心漸減。
外圍方面，商品價格未止跌，加上美國經濟數據轉弱，美股已連跌4日，道指失守200日線接近兩周，失守時間越長，意味調整壓力越大。港股昨日反彈108點或0.44%，收報24514，但成交縮至686億元，係2月24日以來最少，悶到拍烏蠅；成交已連續4日少過800億元，死貓彈幾難持續。
趁弱市吸納俊知
4月以來，股市經過喪升喪跌後，要衡量一隻股票買唔買得過，唔可以齋睇走勢，仲要睇返盈利、派息、資產淨值、現金流，以至股權變動等。
現時市況仍有下行風險，我認為高息股較穩陣，近日心水係內地最大射頻同軸電纜供應商俊知（1300），其主要客戶為三大電訊商中移動（941）、聯通（762）、中電信（728）。
俊知3月派成績表後，股價一路炒上，跟手6月批股，以每股2.27元配售2.61億股新股予深圳上市的怡亞通，集資淨額5.62億元，用作還債及營運。怡亞通從事供應鏈服務，以策略性股東身份入股俊知，成第二大股東，持股16.67%，承諾一年內不減持。
俊知舊年生意增8.1%，多賺17.7%，每股盈利41.3仙，中期和末期都派息7仙，合共派息14仙。舊年增持的江蘇俊知光電通訊，因完成日期為12月30日，所以俊知光電的光纜業績尚未反映於舊年業績，預期今年會為集團帶來龐大商機。
內地進入4G時代，李克強要求三大電訊商提速降價，加上電子商貿、網絡電視等帶動，4G將更普及。
移動互聯網流量上升，通訊設備和配件的需求勢增，俊知的射頻同軸電纜係主要組件，未來收入可望穩增。俊知現價1.83元，PE僅4.4倍，息率達7.7厘；集團快將公佈中期業績，上市以來都有派中期息，派息利好股價，可趁弱市收集，上望2.2元。
割柑人
本欄逢周四刊出