【前晚尖沙】嘴胡杏兒今年算唔算事業愛情兩得意呢？約滿無綫後，唔單止有蕭定一邀加盟，仲有傳邵氏都用銀彈攻勢搵佢過檔。愛情方面就更加唔使講，同男友Phil拍拖時間雖然唔算長，但感情發展一日千里，上月中兩個人仲去咗新加坡睇波，早前亦有報道話Phil希望今年年底娶杏兒過門㖭！
帶家人參觀婚紗店
雖然杏兒未宣佈結婚，但佢同設計師友人Kev合作嘅婚紗店，日前已經開始營業。前晚9點幾，杏兒同父母及Phil等一行十人，先喺尖沙嘴iSQUARE食晚飯，戴晒口罩同帽嘅杏兒全程拖實男友，表現恩愛。食完飯杏兒就同父母及男友坐七人車去金巴利道新開嘅婚紗店，其間記者問杏兒係咪揀婚紗準備年底結婚？杏兒笑住話唔係，身邊嘅Phil就笑笑口，之後佢哋喺婚紗店逗留咗半個鐘左右先離開。離開時，記者再問杏兒媽咪，覺得準女婿點樣？杏兒媽咪聽完即刻面露喜悅笑容，雖然冇答記者問題，但就禮貌地鞠躬同記者講多謝，似乎對呢個準女婿好滿意。
採訪：楊浩賢、羅德光
攝影：黃曉程、畢紹基
