中環有兩條食街，即史丹利街與威靈頓街。史丹利街較短，由德己立街去到嘉咸街，特色係街頭之陸羽茶室、一樂燒鵝、新同樂魚翅，及陸羽對面之一幢小型銀座式商廈，幾乎每層都係食肆。一樓「山下鐵板燒」最為高檔，每日中午，中環人就在商廈地下排隊搭𨋢上去食飯；行到街尾，以目前香港罕見嘅大牌檔最有特色。
威靈頓街喺雲咸街高點，一路落斜、上斜、落斜，至與皇后大道中匯合為止，如果一路行一路睇手機，好容易仆親。此街嘅食店更多，數不勝數，上中下價錢與最貴嘅漢堡包都有，最有名氣嘅自不然係近街頭嘅鏞記酒家及翠華茶餐廳，近街尾嘅蓮香樓，街中間嘅麥奀記雲吞麵與豚王拉麵。翠華茶餐廳行上啲亦有一間銀座式食肆商廈，不讓史丹利嗰間專美，照樣在中午時分有食客在街上排隊入內搭𨋢，上面有一間賣海南雞飯，左丁山食過，覺得水準超過翠華之「秘製海南雞」。
鏞記酒家幾個月前翻新地下裝修，近日大功告成，在七月三十日星期四黃昏舉行酒會，招待熟客。資深經理威哥認真唔話得，事先親自走上左丁山寫字樓，送上請帖，咁有誠意，唔去點得？當晚去到，鏞記地下大堂果然煥然一新，加設三張「卡座」，據老闆甘琨禮兄講，不是加設，而係復古重設，以前創辦人甘穗輝先生喜歡坐在地下卡位督師。歌星鄧麗君在娛樂行金寶夜總會長駐時，每晚十點零就到嚟休息坐一坐食番啲嘢，喜歡坐在卡位，背向大門。
鏞記係中式酒家，呢次地下大堂裝修，大廈冷氣系統換過新嘅，電梯都換埋，花費不菲。而此晚酒會嘅口號係英文Regeneration（唔見中文繙譯），當然別有意思，Regeneration有再生，新生，恢復重新，復興等意思，神學上解釋係精神重生（Spiritual rebirth），生物學上係指已失去或受損嘅器官恢復生機，對鏞記來講，自創辦人逝世，兄弟對簿公堂，家族分裂之後，二弟甘琨禮與兒子甘連宏，女兒甘蕎茵兩代掛帥，務必要使鏞記恢復元氣，在舊有基礎上尋求突破，更勝舊時。左丁山做銀行trainee時，已在鏞記地下企在食客後面等位食燒鵝瀨，近二十年則多在四樓訂位，對鏞記第二代第三代渴求Regeneration，願樂觀其成。