女示威者被判「以胸襲警」罪名成立，事件引起海外傳媒高度關注，《時代》網站、英國《獨立報》都有報道，八方估唔到連美國清談節目都抽水，真係揚威國際。
話說美國TBS頻道嘅清談節目《Conan》，主持人Conan O'Brien開場時拎呢單新聞嚟搞gag，話受襲嘅警員應該要求道歉，同時希望女示威者再次「襲警」，佢拍檔即時玩埋一份，話呢啲用個胸去襲警一定係功夫（martial arts）招式！Conan O'Brien即時雙手扮揸胸係咁揈，「示範」用個胸當雙截棍！有網民睇完笑到死、亦有網民相當「憤怒」，直言咁樣侮辱港人同法庭判決點得？要求律政司司長袁國強立即出聲明譴責Conan O'Brien！