或許很多人已覺得香港樂壇已死，偏偏淡出好幾年的盧巧音(Candy)卻仍然有顆難捨的心，悄悄然於去年又再回歸了這片凋零領域。曾經嚐過流行曲的盛況，Candy卻明瞭不可能再緬懷過去，更重要是向前看、用心做：「Hea嗰啲(歌手)就會自動被淘汰㗎喇！」口吻爽而直，夾開band，無怪乎言語間還是一樣的辛辣。
說盧巧音爽，除了她的對答直率之外，還有百分之八十是因為她於拍攝當日，毫不忸怩便應我們提議，半裸上身拍了一張火辣露背照，沒有對自己身形有幾分自信的自然做不出來，即使keep得fit也難得身懷那份「影就影怕你呀！」的guts，幾秒間沒有遲疑，爽快說好就做，又有幾多位女星即場做得出？
一生搖滾
烈女說是便是似乎是本性使然，看待搖滾的倔強也如是，「呢世都係rock'n roll㗎喇，就算我唱情歌又好，又或者所謂K歌，但我嘅root都係搖滾，始終都係夾band出身，真係離唔開呢一個範疇。同埋夾band真係一件好開心嘅事，講求team work，所以rock'n roll真係never die呀！」
Candy去年復出推出《田園驚夢》，至月前再推第二首新歌《哲學家》，慢工出細貨，「可能年底才出EP，唔會夾硬做十幾首然後得五首有人聽，大家都明乜事啦，不如畀心機做好五隻歌。」
樂壇生態與市場環境十年間面目全非，Candy自言復出之後也有跟不上的地方，卻仍然對前景抱樂觀心態，「係要接受時代唔同咗，仲記住舊時賣30萬隻碟？多咗咁多網上平台，冇得同舊時比。Hea嗰啲(歌手)就會自動被淘汰㗎喇！所以要做好啲，我都keep住上堂學唔同唱法、學聲學，將舊習慣改咗佢，冇嘢係學得晒嘅。」
重新出發
外在大環境轉變了，Candy的價值觀也隨踏入四十歲而不惑，「以前追求錢啦、 名利啦，我要喺乜嘢場合唱歌啦。但𠵱家唔係咁諗，喺呢個歲數、 呢個階段應該要好好享受做事嘅過程，因為去到最後結局點樣，who cares? 喺過程中點樣學習、有唔同嘅得着先最重要。」Candy從前做專輯每一步都參與其中，現在反而想放手讓公司團隊去處理，「冇可能做晒啲嘢，以前收歌、派歌、artwork都理，𠵱家覺得專注番唱歌，放鬆少少都會開心啲。好似styling，都覺得要畀new blood後生仔去做，如果唔係成日都同一個style，人哋都覺得悶啦，我係求變嘅。」
變身賢妻
Candy予人烈女形象，2013年與Kolor主音蘇浩才(Sammy)結婚，從此變身丈夫背後的賢妻，「賢妻係要做嘅，做家務離唔開煮飯洗衫啦，我其實都幾鍾意做家務嘅，我覺得做咗人妻子就要尊重丈夫，要撐佢啦， 尊重同埋支持佢每個決定，身為內子就做屋企嘅事，等佢擔心少樣嘢，你就出去闖啦！」在夫妻相處之道上，烈女倒是非常傳統。老公同是rock友，二人難免火爆頂撞，Candy卻說多得媽媽教落，「真係要step back，互相遷就囉！」
紋身癮Q&A
Q：記者 A：盧巧音
盧巧音都算是樂壇中最多紋身的女歌手，她愛上紋身始於1998年的第一次，從此上癮，不過她直言因為年紀不輕，皮膚彈性不如往昔，「一定會再紋，但真係要諗清楚紋乜，唔想改。」
身上究竟有幾多個紋身？
我都真係數唔清楚，應該有十零廿個啦！
紋邊度最痛？
手臂內側即係bye bye肉，可能皮薄，唯一一次要用麻醉膏。
感受最深刻嘅一個紋身係？
紋左手手臂的第一個紋身，因為個紋身已成為我個symbol，係代表咗我咁。
點解咁鍾意紋身？
好似有少少變態，但係我鍾意落針嗰吓痛，知道痛完有靚嘅嘢出現，同埋感受到自己嘅存在。
統籌：林妙萍
撰文、造型：趙潔恆
攝影：郭賢興
化妝：Yola Hung
髮型：Matt of Xenter
更多精采時尚內容，盡在 http://add.appledaily.com 。