早前被指誤導學生錄製撐政改片段嘅香港廣西社團總會，有讀者話佢哋屬下嘅廣西青年聯會主席鍾易民喺社交媒體貼圖（圖），話本周六喺如心南灣海景酒店舉辦泳池派對，每位600蚊，為山區建校籌款，海報上仲話有「比堅尼比賽」，質疑活動性質同目的格格不入。
八方了解過，據知浸大中研舊生會用咗數年時間喺廣西覓地建校，其間邀請廣西社團總會協助籌款，而今次以泳池派對為名籌款，據聞連舊生會都覺得唔妥ban咗，但當時廣西青年聯會已將浸大標誌放入海報。
冇申請用浸大logo
鍾易民向八方證實有分享活動嘅海報，但拒進一步回應。廣西社團總會職員則話總會同舊生會喺廣西建校，呢次活動邀請舊生會內閣成員、廣西青年聯會會員，或要經人介紹先參加，唔係開放畀公眾。浸大就話屬下院系冇份搞泳池派對，仲踢爆對方冇申請就用浸大logo。據大學了解，中國研究課程舊生會已要求主辦團體刪除浸大標誌。