阿積士呢支褪色班霸，衰到喺歐聯第三圈外圍賽出局。佢哋上周首回合作客奧地利鬥維也納迅速踢成2:2，諗住周二次回合返主場「依絲執」，點知半場就俾迅速兩破施利臣（黑衫）嘅大門，就算換入阿仙奴借將耶耶辛洛高，最後都係輸2:3，兩回合計輸4:5出局。隊長卡拉臣賽後鬧爆全隊好似幼稚園學生踢波咁。而同日晉級嘅法甲球隊摩納哥同埋維也納迅速，都會有機會喺附加賽抽中鬥曼聯。